Informacion

E Plataforma aki ta un aliansa di colaboracion, formalisa mediante un Convenio di Cooperacion firma dia 3 di december 2012. Esaki ta nifica cu tur e organisacionnan cu ta forma parti di e plataforma aki ta comprometi pa traha hunto cu otro pa fortalece otro na vanguardia di e bienestar di persona cu limitacion motorico, intelectual, visual of auditivo na Aruba.

E lema di e Plataforma ta:“Hey, Mi tambe t’ey!” Indicando asina cu personanan cu discapacidad tambe ta forma parti di e comunidad Arubiano.

Plataforma pa Persona cu Limitacion kier gradici abo pa sostene nos grupo meta cu ta personanan cu limitacion.

Manera abo y nos di PPL, personanan cu limitacion tambe tin e derecho di forma parti di nos comunidad.

Hey Mi Tambe T’ey!

 

Lansamento di proyecto nobo: Jobcoach 

Tur aña Plataforma pa Persona cu Limitacion ta celebra 3 di december como Dia Internacional di Persona cu Limitacion. E aña aki no ta ningun excepcion.

Personanan cu limitacion na Aruba ta contra cu varios barera ora nan bay (purba) traha. Algun di e bareranan aki ta kisas un doño di trabou cu no ta habri pa duna nan un chens, coleganan cu no kier coopera, duda den nan mes. Hopi bes e trahado cu limitacion, e doño di trabou y coleganan tin mester di un guia pa yuda mantene e trahado cu limitacion na trabou. E persona cu por duna e guia aki ta un jobcoach.

E Proyecto Jobcoach a lanta pa bin cu un jobcoach specialisa den busca y haya trabou pa persona cu limitacion den e mercado laboral di Aruba. Esey a logra e aña aki. Stichting Trampolin pa Trabao, cu fondonan di Samenwerkende Fondsen di Hulanda, via CEDE Aruba, a tuma desde 15 di april 2015 sr. Lionel Rumnit como jobcoach pa persona cu limitacion. Diahuebs, 3 di december 2015 a lansa den presencia di invitadonan e bunita proyecto aki durante e celebracion di Dia Internacional di Persona cu Limitacion na Surfside Marina.